सातारा, २२ जुलै :साताऱ्या मध्ये दिवसाढवळ्या थरार! एकतर्फी प्रेमातून माथेफिरूने शाळकरी मुलीला चाकूच्या धाकावर धरले ओलीस तब्बल १५ मिनिटे चाललेल्या या थरारनाट्यात एका धाडसी तरुणाने स्वतःचा जीव धोक्यात घालून मुलीची सुटका केली. आरोपीला अटक, साताऱ्यात तणावाचे वातावरण.
एकतर्फी प्रेमातून एका माथेफिरू तरुणाने शाळेतून घरी परतणाऱ्या दहावीतील विद्यार्थिनीला भररस्त्यात अडवून चाकूच्या धाकावर ओलीस धरल्याची थरकाप उडवणारी घटना सोमवारी साताऱ्यात घडली. सुमारे १५ मिनिटे चाललेल्या या थरारनाट्यामुळे परिसरात प्रचंड खळबळ उडाली. अखेर, एका धाडसी तरुणाने आणि स्थानिकांनी प्रसंगावधान दाखवत मुलीची सुखरूप सुटका केली आणि आरोपीला पोलिसांच्या हवाली केले. या घटनेमुळे शहरातील मुलींच्या सुरक्षेचा प्रश्न पुन्हा एकदा ऐरणीवर आला आहे.
सातारा मध्ये नेमकं काय घडलं?
सातारा शहरातील करंजे परिसरातील बसप्पा पेठेत राहणारी एक अल्पवयीन मुलगी, जी इयत्ता दहावीत शिकते, सोमवारी संध्याकाळी ४ च्या सुमारास नेहमीप्रमाणे स्कूल बसमधून उतरून घराकडे निघाली होती. दुपारपासूनच तिच्यावर पाळत ठेवून बसलेला आर्यन चंद्रकांत वाघमळे (वय १८) नावाचा तरुण दबा धरून बसला होता. मुलगी जवळ येताच त्याने तिचा रस्ता अडवला.
घाबरलेल्या मुलीने आरडाओरडा करताच आर्यनने आपल्याजवळील चाकू काढून थेट तिच्या गळ्याला लावला. एका हातात चाकू आणि दुसऱ्या हाताने मुलीचा गळा आवळून, “माझ्यासोबत पुण्याला चल, नाहीतर तुझा जीव घेईन,” अशी धमकी तो देऊ लागला. हा भयंकर प्रकार पाहून परिसरातील नागरिक जमा झाले. त्यांनी तरुणाला समजावण्याचा खूप प्रयत्न केला, पण तो कोणाचेही ऐकण्याच्या मनस्थितीत नव्हता. उलट, तो जमावाला चाकूचा धाक दाखवून धमकावत होता.
धाडसी तरुणाने वाचवले प्राण
परिस्थितीचे गांभीर्य ओळखून एका नागरिकाने सातारा शहर पोलीस ठाण्यातील पोलीस हवालदार सागर निकम आणि धीरज मोरे यांना घटनेची माहिती दिली. पोलीस तातडीने घटनास्थळी दाखल झाले. त्यांनीही आरोपीशी बोलणी सुरू केली, पण तो अधिकच आक्रमक होत होता.
तेव्हाच, जमावातील उमेश आडगळे या धाडसी तरुणाने एक धाडसी निर्णय घेतला. त्याने आरोपीचे लक्ष नसताना मागच्या बाजूने सोसायटीच्या कंपाऊंडवरून उडी मारली आणि थेट आर्यनवर झडप घातली. त्याने आर्यनच्या हातातील चाकू घट्ट पकडून बाजूला केला. त्याच क्षणी पोलीस आणि इतर नागरिकांनी तरुणाला पकडले आणि मुलीची त्याच्या तावडीतून सुखरूप सुटका केली. संतप्त जमावाने आरोपीला चांगलाच चोप देऊन पोलिसांच्या स्वाधीन केले.
आरोपीची पार्श्वभूमी आणि गुन्हा दाखल
पोलिसांनी दिलेल्या माहितीनुसार, आरोपी आर्यन वाघमळे हा बारावीत शिकत असून तो पूर्वी पीडित मुलीच्याच अपार्टमेंटमध्ये राहत होता. तो मुलीवर एकतर्फी प्रेम करत होता आणि तिला सतत त्रास देत होता. काही महिन्यांपूर्वी त्याच्या वडिलांचे निधन झाल्यानंतर तो मामाकडे राहायला गेला होता, पण तिथूनही तो मुलीला भेटण्यासाठी दबाव टाकत होता. मुलीने आणि तिच्या कुटुंबीयांनी त्याला अनेकदा समजावून सांगितले होते, पण त्याच्या वागण्यात फरक पडला नाही. याच रागातून त्याने हे धक्कादायक कृत्य केल्याचे समोर आले आहे.
शाहूपुरी पोलिसांनी आर्यन वाघमळे विरोधात पॉक्सो (POCSO), विनयभंग, हत्यार कायदा आणि जीवे मारण्याची धमकी देणे अशा गंभीर कलमांखाली गुन्हा दाखल करून त्याला अटक केली आहे.
नागरिकांमध्ये भीतीचे वातावरण, सुरक्षेचा प्रश्न ऐरणीवर
भरदिवसा घडलेल्या या घटनेमुळे साताऱ्यात, विशेषतः करंजे परिसरात भीतीचे वातावरण पसरले आहे. शाळा-महाविद्यालयातील विद्यार्थिनींच्या सुरक्षेचा मुद्दा पुन्हा एकदा चर्चेत आला आहे. या परिसरात पोलिसांनी गस्त वाढवावी, अशी मागणी जोर धरू लागली आहे. पोलीस या प्रकरणाचा अधिक तपास करत आहेत.