पुणे/Pune : शहराच्या उच्चभ्रू समजल्या जाणाऱ्या कोंढवा परिसरात एका हाय-प्रोफाईल सोसायटीमध्ये बुधवारी, २ जुलै रोजी रात्री एका २२ वर्षीय तरुणीवर लैंगिक अत्याचार झाल्याची धक्कादायक घटना उघडकीस आली आहे. कुरिअर बॉय असल्याचे भासवून घरात घुसलेल्या नराधमाने तरुणीला बेशुद्ध करून हे अमानुष कृत्य केले. इतकेच नाही, तर पीडितेच्याच मोबाईलमध्ये स्वतःचा सेल्फी काढून ‘मी पुन्हा येईन’ अशी धमकीवजा चिठ्ठी लिहून तो फरार झाला. या घटनेने संपूर्ण शहरात खळबळ उडाली असून, पोलिसांची १० पथके आरोपीच्या शोधात आहेत.
नेमकी घटना काय?
कोंढवा परिसरातील एका प्रतिष्ठित सोसायटीच्या अकराव्या मजल्यावर पीडित तरुणी आपल्या भावासोबत राहते. मूळची अकोल्याची असलेली ही तरुणी कल्याणी नगर येथील एका नामांकित कंपनीत नोकरी करते. तिचा भाऊ गावी गेल्याने ती घरात एकटीच होती.
बुधवारी संध्याकाळी साडेसातच्या सुमारास आरोपी कुरिअर बॉय असल्याचे सांगून सोसायटीमध्ये शिरला. सुरक्षा रक्षकाने अडवल्यावर त्याने कुरिअर देण्याचे कारण सांगितले. पीडितेच्या फ्लॅटवर पोहोचल्यावर त्याने बेल वाजवली. तरुणीने दरवाजा उघडताच त्याने कुरिअर आल्याचे सांगितले. मात्र, कुरिअर आपले नसल्याचे तरुणीने सेफ्टी डोअरमधूनच सांगितले. तरीही आरोपीने आग्रह धरल्याने तरुणीने सेफ्टी डोअर उघडले.
यानंतर, सही करण्यासाठी पेन नसल्याचे कारण सांगून त्याने तरुणीला आतून पेन आणायला सांगितले. ती आत जाताच आरोपीने घरात घुसून दरवाजा बंद केला आणि तिच्यावर केमिकल स्प्रे फवारला, ज्यामुळे ती जागीच बेशुद्ध झाली. यानंतर आरोपीने तिच्यावर अत्याचार केला.
‘मी पुन्हा येईन’ – आरोपीची धक्कादायक धमकी
आरोपी एवढ्यावरच थांबला नाही. त्याने अत्याचारानंतर पीडितेच्या मोबाईलमध्ये स्वतःचा सेल्फी काढला आणि “मी पुन्हा येईन, जर ही घटना कुणाला सांगितलीस तर तुझे फोटो व्हायरल करेन,” असा मेसेज टाईप करून ठेवला व तिथून पळ काढला. रात्री साडेआठच्या सुमारास शुद्धीवर आल्यानंतर हा सर्व प्रकार तरुणीच्या लक्षात आला. प्रचंड घाबरलेल्या अवस्थेत तिने कुटुंबीयांना माहिती दिली आणि कोंढवा पोलीस ठाण्यात तक्रार दाखल केली.
पोलिसांचा तपास वेगात, १० पथके तैनात
घटनेचे गांभीर्य लक्षात घेऊन कोंढवा पोलिसांनी तात्काळ घटनास्थळी धाव घेतली. या प्रकरणी अज्ञात आरोपीविरोधात भारतीय न्याय संहितेच्या कलम ६४, ७७ आणि ३५१(२) अंतर्गत गुन्हा दाखल करण्यात आला आहे.
पुण्याचे पोलीस उपायुक्त राजकुमार शिंदे यांनी दिलेल्या माहितीनुसार, आरोपीचा शोध घेण्यासाठी १० विशेष पथके तयार करण्यात आली आहेत. पीडित तरुणी सध्या मानसिक धक्क्यात असून, तिच्यावर ससून रुग्णालयाच्या ट्रॉमा सेंटरमध्ये उपचार सुरू आहेत. महिला अधिकाऱ्यांच्या मदतीने तिचा जबाब नोंदवण्यात येत आहे.
सीसीटीव्ही फुटेज हाती, सुरक्षेचा प्रश्न ऐरणीवर
सोसायटीतील सीसीटीव्ही कॅमेऱ्यात आरोपीचा चेहरा कैद झाला असून, त्या आधारे पोलीस त्याचा शोध घेत आहेत. तसेच, कॉल डेटा रेकॉर्ड आणि फिंगरप्रिंट्सच्या माध्यमातूनही आरोपीचा माग काढला जात आहे.
या घटनेमुळे उच्चभ्रू सोसायट्यांमधील सुरक्षेचा प्रश्न पुन्हा एकदा ऐरणीवर आला आहे. आरोपीने सहजरित्या सुरक्षा रक्षकांना चकवून आत प्रवेश मिळवल्याने आश्चर्य व्यक्त होत आहे. आरोपी खरोखरच कुरिअर बॉय होता की त्याने केवळ बनाव केला होता, याचा तपास पोलीस करत असून, शहरातील कुरिअर कंपन्यांशीही संपर्क साधला जात आहे.
या प्रकरणाने पुणे शहरातील महिलांच्या सुरक्षेवर गंभीर प्रश्नचिन्ह निर्माण केले असून, आरोपीला लवकरात लवकर अटक करण्याचे आव्हान पोलिसांसमोर आहे.