मुंबई हादरली: पवईत १७ मुलांना डांबणारा रोहित आर्य पोलीस चकमकीत ठार; मोदींनी केले होते कौतुक, केसरकरांशी होता थेट संबंध!

‘स्वच्छता मॉनिटर’ प्रकल्पाचे २ कोटी थकवल्याचा केला होता आरोप; पोलिसांच्या गोळीबारावर राजकीय प्रश्नचिन्ह

मुंबई:

मुंबईच्या पवई परिसरात गुरुवारी दुपारी एका थरारक घटनेने खळबळ उडाली. ‘ऑडिशन’च्या बहाण्याने १७ लहान मुलांना एका स्टुडिओत डांबून ठेवणारा रोहित आर्य (Rohit Arya) हा पोलीस चकमकीत ठार झाला. पवई पोलिसांनी अत्यंत शिताफीने या सर्व मुलांची सुखरूप सुटका केली.

मात्र, या चकमकीनंतर रोहित आर्यचा जो पूर्वेतिहास समोर आला आहे, त्याने सर्वांनाच धक्का बसला आहे. रोहित हा ‘पीएलसी स्वच्छता मॉनिटर’ या प्रकल्पाचा संस्थापक होता, ज्याचे कौतुक खुद्द पंतप्रधान नरेंद्र मोदी यांनी केले होते आणि तत्कालीन शिक्षणमंत्री दीपक केसरकर यांनीही त्याला आर्थिक मदत केल्याचे समोर आले आहे.

पवईत घडला थरार… असा झाला एन्काऊंटर

गुरुवारी दुपारी पावणेदोनच्या सुमारास, पवईतील महावीर बिल्डिंगमधील ‘राज स्टुडिओ’मध्ये रोहित आर्यने १५ वर्षांखालील १७ मुलांना डांबून ठेवल्याची माहिती पोलिसांना मिळाली. परिस्थितीचे गांभीर्य ओळखून पोलिसांनी तात्काळ घटनास्थळी धाव घेत इमारतीला वेढा घातला.

रोहितकडे एअर गन होती आणि त्याने मुलांच्या खोलीच्या खिडक्यांना सेन्सर लावले होते, ज्यामुळे बचावकार्य गुंतागुंतीचे बनले. पोलिसांनी सुरुवातीला त्याच्याशी बोलणी करण्याचा प्रयत्न केला, पण तो ऐकण्याच्या मनस्थितीत नव्हता.

अखेर, एका पथकाने त्याला बोलण्यात गुंतवून ठेवले असतानाच, पवई पोलीस स्टेशनच्या अधिकाऱ्यांनी बाथरूमच्या मार्गाने स्टुडिओत प्रवेश केला. पोलीस आत शिरल्याचे पाहताच रोहितने एअर गनने मुलांवर किंवा पोलिसांवर हल्ला करण्याचा प्रयत्न केला. याचवेळी, सहायक पोलीस निरीक्षक अमोल वाघमारे यांनी मुलांच्या संरक्षणासाठी रोहितच्या दिशेने गोळी झाडली. ती गोळी रोहितच्या छातीत लागली. त्याला बाळासाहेब ठाकरे ट्रॉमा सेंटरमध्ये दाखल करण्यात आले, मात्र उपचारापूर्वीच त्याचा मृत्यू झाला. पोलिसांनी सर्व १७ मुलांची सुखरूप सुटका केली, मात्र या धावपळीत एक लहान मुलगी आणि एक ज्येष्ठ नागरिक किरकोळ जखमी झाले.

कोण होता रोहित आर्य? मोदी-केसरकरांशी कनेक्शन

पोलीस चकमकीत ठार झालेला रोहित आर्य हा मूळचा पुण्याचा असून, तो ‘पीएलसी स्वच्छता मॉनिटर’ या प्रकल्पाचा संस्थापक होता. या प्रकल्पाद्वारे शाळकरी मुले स्वच्छतेबाबत जनजागृती करत. २०१३ मध्ये गुजरातमध्ये ‘लेट्स चेंज’ नावाने त्याने ही मोहीम सुरू केली होती, तेव्हा तत्कालीन मुख्यमंत्री नरेंद्र मोदींनी त्याच्या कल्पनेचे कौतुक केले होते.

२०२२ मध्ये, तत्कालीन शालेय शिक्षण मंत्री दीपक केसरकर यांच्या सूचनेवरून हा प्रकल्प महाराष्ट्रात सुरू झाला. २०२३-२४ मध्ये ‘मुख्यमंत्री माझी शाळा, सुंदर शाळा’ या अभियानांतर्गत हा प्रकल्प राबवण्यासाठी २ कोटी रुपयांची तरतूदही करण्यात आली.

सरकारी पैशांवरून वाद आणि उपोषण

मात्र, हे २ कोटी रुपये आपल्याला कधीच मिळाले नाहीत, असा आरोप रोहितने गेल्या वर्षी ऑक्टोबरमध्ये केला होता. पैसे मिळवण्यासाठी त्याने जुलै व ऑगस्ट २०२४ मध्ये उपोषणही केले होते. २९ सप्टेंबर २०२४ रोजी त्याने दीपक केसरकर यांच्या सरकारी बंगल्याबाहेर उपोषण केले, तेव्हा केसरकरांनी त्याला वैयक्तिक मदत म्हणून ७ लाख आणि ८ लाख रुपयांचे दोन चेक दिले होते, असा दावाही रोहितने केला होता.

राजकीय प्रतिक्रिया आणि प्रश्नचिन्ह

या संपूर्ण प्रकरणावर आता राजकीय प्रतिक्रिया उमटू लागल्या आहेत.

• दीपक केसरकर (मंत्री): “रोहित आर्य ‘स्वच्छता मॉनिटर’ नावाची स्कीम चालवायचे हे खरे आहे. मात्र, त्यांनी मुलांकडून थेट फी आणि पैसे वसूल केल्याचे समोर आले होते. शासनाचे पैसे बुडत नाहीत, त्याला एक प्रक्रिया असते. मी शिक्षणमंत्री असताना त्यांना स्वतः पैसे दिले होते,” असे केसरकर यांनी म्हटले.
• विजय वडेट्टीवार (काँग्रेस नेते): “मुंबई पोलीस रोहितला मनोरुग्ण म्हणत आहेत. जर तो मनोरुग्ण होता, तर शिक्षण विभागाने त्याच्यावर संवेदनशील योजनांची जबाबदारी कशी दिली? सरकार सत्य दडपत आहे का?” असा सवाल वडेट्टीवार यांनी उपस्थित केला आहे.

रोहित आर्यच्या मृत्यूमुळे अनेक प्रश्न अनुत्तरित राहिले आहेत. राज्याच्या शिक्षण विभागासोबत काम करणारा ‘स्वच्छता मॉनिटर’चा संस्थापक लहान मुलांच्या ‘ऑडिशन’च्या ठिकाणी काय करत होता? त्याचा आणि ॲक्टिंगचा काय संबंध? सरकारी पैशांच्या वादामुळेच त्याने हे टोकाचे पाऊल उचलले का? या सर्व प्रश्नांची उत्तरे आता पोलीस तपासातूनच समोर येतील.