फलटण: फलटण येथील उपजिल्हा रुग्णालयात वैद्यकीय अधिकारी म्हणून कार्यरत असलेल्या डॉक्टर संपदा मुंडे यांच्या आत्महत्येने संपूर्ण सातारा जिल्हा हादरला आहे. या प्रकरणी डॉ. मुंडे यांनी आत्महत्या करण्यापूर्वी आपल्या हातावर लिहिलेल्या ‘प्रशांत बनकर’ आणि ‘पीएसआय गोपाल बदने’ या दोन नावांनी खळबळ उडवून दिली. यातील आरोपी प्रशांत बनकरला पोलिसांनी शनिवारी पुण्यातून अटक केल्यानंतर, फरार असलेला मुख्य आरोपी पीएसआय गोपाल बदने याच्यावर सर्वांचे लक्ष होते.
मुख्यमंत्री देवेंद्र फडणवीस यांच्या फलटण दौऱ्याच्या पार्श्वभूमीवर, बदनेच्या अटकेसाठी पोलिसांवर मोठा दबाव होता. अखेर, शनिवारी रात्री ११ वाजण्याच्या सुमारास पीएसआय गोपाल बदने हा स्वतः फलटण ग्रामीण पोलीस स्टेशनमध्ये हजर झाला, त्यानंतर पोलिसांनी त्याला अटक केली.
फलटण बदनेच्या हजर होण्यावर संशयाची सुई
पीएसआय गोपाल बदने याच्या शरण येण्यावरून अनेक प्रश्न उपस्थित होत आहेत. डॉ. मुंडे यांच्या मृत्यू प्रकरणी गुन्हा फलटण शहर पोलीस स्टेशनमध्ये दाखल झाला आहे. मात्र, बदने हा शहर स्टेशनऐवजी आपण स्वतः कार्यरत असलेल्या फलटण ग्रामीण पोलीस स्टेशनमध्ये हजर झाला. विशेष म्हणजे, या दोन्ही पोलीस स्टेशन्समध्ये केवळ पाच मिनिटांचे अंतर आहे.
त्यामुळे, गुन्हा दाखल असलेल्या जवळच्या शहर पोलीस स्टेशनऐवजी त्याने ग्रामीण स्टेशन का निवडले? त्याला पोलिसांकडूनच मदत केली गेली का? अशी शंका उपस्थित होत आहे. काही वृत्तांनुसार, डॉ. मुंडे यांच्या मृत्यूची बातमी समोर आली, त्या रात्री बदने हा ग्रामीण पोलीस स्टेशनमध्ये कर्तव्यावर होता आणि प्रकरणाचे गांभीर्य लक्षात येताच तो फरार झाला होता.
‘मी प्रामाणिक आहे’ – बदनेचा दावा
पोलिसांना शरण आल्यानंतर माध्यमांच्या प्रतिनिधींनी बदनेला प्रश्न विचारले. यावेळी तो म्हणाला, “मी प्रामाणिक आहे. न्यायालय जो काही निर्णय देईल, त्यावर माझा विश्वास आहे. माझा पोलीस प्रशासनावरही विश्वास आहे.” पोलिसांनी बदनेची सुमारे एक तास चौकशी केल्यानंतर त्याला वैद्यकीय तपासणीसाठी नेण्यात आले.
डॉ. मुंडे हॉटेलमध्ये का गेल्या होत्या?
डॉ. मुंडे या आरोपी प्रशांत बनकर याच्या घरी भाड्याने राहत होत्या. पोलिसांच्या तपासातून समोर आलेल्या माहितीनुसार, डॉ. मुंडे आणि प्रशांत बनकर यांच्यात कडाक्याचे भांडण झाले होते. “तुम्ही आमच्या इथे राहायचं नाही,” असे बनकरने डॉ. मुंडेंना सुनावले होते. यानंतर, राहण्याचा प्रश्न निर्माण झाल्याने डॉ. मुंडे यांनी २३ तारखेला पहाटे फलटण येथील हॉटेल मधुदीपमध्ये दोन दिवसांसाठी रूम बुक केली. मात्र, दिवसभर रूमचा दरवाजा न उघडल्याने संशय आला आणि २३ तारखेला संध्याकाळी ४ वाजता हॉटेल मॅनेजमेंटने दार उघडले असता, डॉ. मुंडे यांचा मृत्यू झाल्याचे उघड झाले.
हातावर लिहिलेली ती सुसाईड नोट
डॉ. संपदा मुंडे यांनी आत्महत्येपूर्वी हातावर लिहिलेल्या मजकुरात पीएसआय बदनेवर अत्यंत गंभीर आरोप केले आहेत. “माझ्या मरणाचं कारण पीएसआय गोपाल बदने, यांनी आपल्यावर चार वेळा अत्याचार केला,” असे त्यांनी लिहिल्याचे समोर आले आहे.
खासदारांच्या दबावाच्या आरोपावर पोलिसांचे स्पष्टीकरण
या प्रकरणात सुरुवातीपासूनच एका खासदाराचा दबाव असल्याच्या बातम्या येत होत्या. ठाकरे गटाचे नेते अंबादास दानवे यांनी थेट माढ्याचे माजी खासदार रणजितसिंह नाईक निंबाळकर यांचे नाव घेत आरोप केले होते. मात्र, निंबाळकर यांनी हे सर्व आरोप फेटाळून लावले.
यावर पोलीस अधीक्षक तुषार दोषी यांनी माध्यमांशी बोलताना स्पष्टीकरण दिले. “खासदारांचा उल्लेख हा विषय पूर्णपणे वेगळा आहे. खासदारांचे नाव हे मयत डॉक्टरने जिल्हा शल्य चिकित्सकांना लिहिलेल्या पत्रात आहे. सध्याच्या गुन्ह्याशी (आत्महत्या प्रकरण) याचा कोणताही संबंध दिसत नाही,” असे दोषी यांनी स्पष्ट केले.
प्रेम प्रकरणाचा अँगल?
तपासात असेही समोर आले आहे की, हॉटेलमध्ये गेल्यानंतर डॉ. मुंडे यांनी प्रशांत बनकर आणि गोपाल बदने या दोन्ही आरोपींना वारंवार फोन केले होते. बनकर आणि डॉ. मुंडे यांच्यात व्हॉट्सॲप चॅटिंग सुद्धा झाले होते. त्यामुळे पोलीस या प्रकरणाचा प्रेम प्रकरणाच्या अँगनेदेखील तपास करत आहेत.
दरम्यान, या संपूर्ण प्रकरणाच्या पार्श्वभूमीवर, मुख्यमंत्री देवेंद्र फडणवीस यांच्या हस्ते फलटण येथे होणारे पोलीस स्टेशन इमारतीचे उद्घाटन रद्द करण्यात आले आहे.