वडोदरा क्राईम : पती नपुंसक, पण ‘वंशाच्या दिव्या’साठी सासराच बनला सैतान; सुनेवर वर्षभर अत्याचार!

पती नपुंसक, पण वंशाच्या दिव्यासाठी सासराच सुनेवर करायचा अत्याचार; गुजरातमधील संतापजनक घटना

वडोदरा, गुजरात: पतीमध्ये दोष असल्यामुळे मूल होत नाही, या कारणावरून एका ४० वर्षीय महिलेवर तिच्या सासऱ्याने आणि नणंदेच्या पतीने वर्षभर अत्याचार केल्याची धक्कादायक आणि संतापजनक घटना उघडकीस आली आहे. या विकृत कृत्याला पतीची मूक संमती होतीच, शिवाय वाचा फोडल्यास अश्लील फोटो आणि व्हिडिओ व्हायरल करण्याची धमकीही तो पत्नीला देत होता. अखेर या शारीरिक आणि मानसिक छळाला कंटाळून पीडितेने पोलिसात धाव घेतल्यानंतर या संपूर्ण प्रकरणाला वाचा फुटली आहे.

पीडितेच्या पतीनेच दिली होती गप्प राहण्याची धमकी, नणंदेच्या नवऱ्याचाही अत्याचारात समावेश, तिघांना अटक.

विस्तृत बातमी:

गुजरातच्या वडोदरा येथील नवापुरा गावात राहणाऱ्या एका ४० वर्षीय महिलेचे लग्न गेल्या वर्षी फेब्रुवारी २०२४ मध्ये झाले होते. उशिरा का होईना, पण आपला संसार सुखाचा होईल या आशेने तिने वैवाहिक जीवनाला सुरुवात केली. मात्र, काही महिन्यांनंतरही मूल होत नसल्याने तिने आणि तिच्या पतीने डॉक्टरांचा सल्ला घेतला. वैद्यकीय चाचण्यांनंतर पतीच्या शरीरात शुक्राणूंची संख्या (Sperm Count) कमी असल्याने नैसर्गिकरित्या गर्भधारणा होणे शक्य नसल्याचे धक्कादायक सत्य समोर आले.

या सत्यामुळे खचून गेलेल्या महिलेला तिच्या सासरच्यांनीच वेगळा मार्ग सुचवला. आयव्हीएफ (IVF) तंत्रज्ञानाचा प्रयत्नही अयशस्वी ठरला आणि दत्तक घेण्यास कुटुंबाने नकार दिला. ‘आपल्या घराण्याला आपल्याच रक्ताचा वंशज हवा,’ यावर सासरचे लोक ठाम होते.

अत्याचाराची सुरुवात आणि पतीचा विश्वासघात

जुलै २०२४ मध्ये, पती घरात नसताना पीडितेच्या सासऱ्याने तिच्या खोलीत घुसून तिच्यावर लैंगिक अत्याचार केला. हादरलेल्या पीडितेने दुसऱ्या दिवशी हा प्रकार नवऱ्याला सांगितला असता, तिला न्यायाची अपेक्षा होती. मात्र, नवऱ्याने वडिलांना जाब विचारण्याऐवजी, “मला मूल हवंय, त्यामुळे गप्प राहा. जर कोणाला सांगितलंस, तर तुझे अश्लील फोटो आणि व्हिडिओ व्हायरल करेन,” अशी धमकी देत तिचे तोंड बंद केले.

पतीच्या या विश्वासघाताने आणि बदनामीच्या भीतीने पीडिता गप्प राहिली. याचाच गैरफायदा घेत जुलै ते नोव्हेंबर २०२४ या काळात सासऱ्याने तिच्यावर अनेकदा अत्याचार केला.

अत्याचाराचे सत्र सुरूच

तरीही गर्भधारणा न झाल्याने सासरच्यांची सैतानी वृत्ती अधिकच वाढली. डिसेंबर २०२४ पासून, कुटुंबाने पीडितेच्या नणंदेच्या पतीलाही तिच्यावर अत्याचार करण्यास भाग पाडले. जुलै २०२४ ते मे २०२५ पर्यंत हे अत्याचाराचे सत्र अव्याहतपणे सुरू होते. जून २०२५ मध्ये पीडिता गर्भवती राहिली, पण काही कारणास्तव तिचा गर्भपात झाला. यानंतरही तिचा छळ थांबला नाही.

अखेर पोलिसात धाव

सततच्या शारीरिक आणि मानसिक त्रासाला कंटाळून अखेर पीडितेने नवापुरा पोलीस स्टेशन गाठले आणि आपल्यावर झालेला संपूर्ण प्रसंग पोलिसांना सांगितला. घटनेचे गांभीर्य ओळखून पोलिसांनी तात्काळ पीडितेचा पती, सासरा आणि नणंदेच्या पतीला अटक केली. सुरुवातीला टाळाटाळ करणाऱ्या आरोपींनी पोलिसी खाक्या दाखवताच गुन्ह्याची कबुली दिली.

पोलिसांनी सासऱ्यावर आणि नणंदेच्या पतीवर अत्याचार व छळाचा, तर पतीवर ब्लॅकमेलिंगचा गुन्हा दाखल केला आहे. या प्रकरणात कुटुंबातील इतर कोणी दोषी आढळल्यास त्यांच्यावरही कारवाई केली जाईल, असे पोलिसांनी सांगितले आहे. उशिरा लग्न होऊनही सुखी संसाराची स्वप्ने पाहणाऱ्या एका महिलेला, केवळ पतीमधील दोषाची इतकी मोठी आणि क्रूर शिक्षा भोगावी लागल्याने तिचे आयुष्य उद्ध्वस्त झाले आहे. या घटनेमुळे परिसरात तीव्र संताप व्यक्त होत आहे.