पुणे: मित्रांसोबत सिंहगड किल्ल्यावर फिरायला आलेला एक तरुण रहस्यमयरित्या बेपत्ता झाल्याने खळबळ उडाली आहे. गौतम गायकवाड असे या तरुणाचे नाव असून, गेल्या तीन दिवसांपासून त्याचा शोध सुरू आहे. सुरुवातीला कड्यावरून पाय घसरून अपघात झाल्याची शक्यता वर्तवण्यात येत होती, मात्र आता गडाच्या पायथ्याशी असलेल्या सीसीटीव्ही फुटेजमध्ये एक संशयास्पद तरुण दिसल्याने प्रकरणाला वेगळेच वळण लागले आहे. गौतमवर असलेल्या कर्जाच्या बोजामुळे त्याने स्वतःच बेपत्ता होण्याचा बनाव रचला असावा, असा संशय पोलिसांना आहे.
सिंहगड तरुण बेपत्ता नेमके काय घडले?
मिळालेल्या माहितीनुसार, मूळचा साताऱ्याच्या फलटणचा असलेला आणि सध्या हैदराबाद येथे कामानिमित्त राहणारा गौतम गायकवाड, बुधवार, २० ऑगस्ट रोजी आपल्या चार मित्रांसह सिंहगडावर आला होता. सायंकाळी साडेचारच्या सुमारास गडावरील तानाजी कडा येथे फिरत असताना, ‘लघुशंका करून येतो’ असे मित्रांना सांगून गौतम बाजूला गेला. मात्र, बराच वेळ होऊनही तो परतला नाही. मित्रांनी आजूबाजूच्या परिसरात शोध घेतला, पण तो कुठेही आढळला नाही. अखेर त्यांनी रात्री उशिरा हवेली पोलिसांना या घटनेची माहिती दिली.
शोधकार्यातून संभ्रम वाढला
घटनेची माहिती मिळताच हवेली पोलीस, आपत्ती व्यवस्थापन पथक आणि स्थानिक गिर्यारोहकांच्या मदतीने तातडीने शोधकार्य सुरू करण्यात आले. तानाजी कड्याच्या जवळ गौतमची चप्पल आढळून आल्याने, त्याचा पाय घसरून तो हजार फूट खोल दरीत कोसळल्याची भीती व्यक्त केली जात होती. मुसळधार पाऊस आणि वेगाने वाहणाऱ्या वाऱ्यातही बचाव पथकाने दरीत उतरून शोध घेतला, परंतु गौतमचा कुठलाही माग लागला नाही.
सीसीटीव्ही फुटेजने आणला ट्विस्ट
तपासादरम्यान पोलिसांनी गडाच्या पायथ्याशी आणि जवळच्या राजगड किल्ल्याजवळील सीसीटीव्ही फुटेज तपासले असता, या प्रकरणाचे गूढ आणखी वाढले. सिंहगडाच्या पायथ्याशी असलेल्या एका फुटेजमध्ये काळ्या रंगाची हुडी घातलेला एक तरुण तोंड लपवून गाड्यांच्या आडून पळताना दिसत आहे. तसेच, राजगडजवळच्या दुसऱ्या फुटेजमध्येही तसाच तरुण तोंड लपवून पळताना आढळला आहे. हा तरुण गौतमच असावा, असा पोलिसांना दाट संशय आहे.
कर्जाचा बोजा आणि पलायनाचा संशय
पोलिसांनी गौतमच्या मित्रांकडे चौकशी केली असता, एका धक्कादायक माहिती समोर आली. गौतमवर सुमारे १८ लाख रुपयांचे कर्ज होते. त्याच्या बेपत्ता होण्याची बातमी समजताच, दोन व्यक्तींनी त्याच्या मित्रांना फोन करून पैशांची मागणी केली होती. त्यामुळे, कर्जाच्या या आर्थिक संकटातून सुटका करून घेण्यासाठी गौतमने बेपत्ता होण्याचा बनाव रचला असावा, या दिशेने आता पोलीस तपास करत आहेत.
मात्र, या कथेतही काही प्रश्न अनुत्तरित आहेत. सीसीटीव्ही फुटेजमधील तरुणाने काळ्या रंगाची हुडी घातली आहे, तर गडावर काढलेल्या फोटोमध्ये गौतमने पिवळ्या रंगाचा रेनकोट घातलेला दिसतो. तसेच, गौतमची चप्पल कड्यावर सापडली असताना, सीसीटीव्हीमधील तरुणाच्या पायात शूज दिसत आहेत. या तरुणाची ओळख पटवण्यासाठी पोलिसांनी फुटेज गौतमच्या मित्रांना व नातेवाईकांना दाखवले, परंतु त्यांनीही त्याला ओळखण्यास असमर्थता दर्शवली आहे.
सध्या हवेली पोलीस या प्रकरणाचा सर्व बाजूंनी तपास करत आहेत. गौतमचा अपघात झाला, त्याच्यासोबत काही घातपात झाला की कर्जामुळे त्याने स्वतःच हा पलायनाचा कट रचला, या प्रश्नांची उत्तरे केवळ गौतम सापडल्यावरच मिळू शकतील.