कल्याण: सोशल मीडियावरील ओळख किती धोकादायक ठरू शकते, हे पुन्हा एकदा सिद्ध करणारी एक थरकाप उडवणारी घटना कल्याणमध्ये उघडकीस आली आहे. इंस्टाग्रामवर ओळख झालेल्या तरुणाने आणि त्याच्या सहा मित्रांनी मिळून एका १७ वर्षीय महाविद्यालयीन तरुणीवर तब्बल पाच महिने अत्याचार केल्याची धक्कादायक घटना समोर आली आहे. या प्रकरणी पोलिसांनी सातही नराधमांना अटक केली आहे.
कल्याण नेमकं काय घडलं?
कल्याणमधील एका नामांकित नर्सिंग कॉलेजमध्ये शिकणारी १७ वर्षीय पीडित तरुणी आपल्या आईसोबत राहते. काही महिन्यांपूर्वी तिची इंस्टाग्रामवर राहुल भोईर नावाच्या तरुणाशी ओळख झाली. या ओळखीचे लवकरच प्रेमात रूपांतर झाले. राहुलवर पूर्ण विश्वास ठेवून तरुणी त्याच्यासोबत प्रेमसंबंधात होती. मात्र, त्यानंतर जे घडले ते अत्यंत धक्कादायक होते.
अशी अडकवली प्रेमाच्या जाळ्यात
एप्रिल महिन्यात आरोपी राहुल भोईरने तरुणीसोबत शारीरिक संबंध ठेवले आणि तिची फसवणूक करून त्याचे व्हिडिओ रेकॉर्ड केले. यानंतर त्याने हा व्हिडिओ त्याचा मित्र देवा पाटील याला पाठवला. हा व्हिडिओ पाहून देवाने देखील तरुणीकडे शरीरसुखाची मागणी केली आणि व्हिडिओ व्हायरल करण्याची धमकी दिली. बदनामीच्या भीतीने घाबरलेल्या तरुणीवर देवाने अत्याचार केला.
एकामागून एक, सात जणांचा अमानुष अत्याचार
हा प्रकार इथेच थांबला नाही. राहुल आणि देवाप्रमाणेच त्यांचे मित्र अजित सुर्वसे, गौरव सुर्वसे, हर्षल पोळसे, जयेश मोरे आणि किरण सुर्वसे या सर्वांपर्यंत हा व्हिडिओ पोहोचला. या सातही नराधमांनी त्याच व्हिडिओच्या आधारे तरुणीला ब्लॅकमेल करण्यास सुरुवात केली.
गेल्या पाच महिन्यांपासून हे सातही जण तिला वेगवेगळ्या ठिकाणी, जसे की हॉटेल, मित्राची खोली किंवा लॉजवर नेऊन तिच्यावर आळीपाळीने अत्याचार करत होते. एका घटनेत, तीन आरोपींनी तिला हॉटेलमध्ये बोलावून जबरदस्तीने दारू पाजली आणि सामूहिक अत्याचार करत त्याचाही व्हिडिओ बनवला.
अखेर प्रकरण असे आले उघडकीस
सततच्या अत्याचारामुळे तरुणी मानसिक धक्क्याखाली होती आणि घरात शांत राहत होती. याच काळात ती गर्भवती राहिल्यानंतर आरोपींनी तिचे गर्भपातही केले. पाच महिने हा भयावह प्रकार सुरू होता. अखेर, नराधमांनी बनवलेला एक व्हिडिओ सोशल मीडियावर शेअर झाला आणि तो पीडितेच्या कुटुंबीयांपर्यंत पोहोचला. हा व्हिडिओ पाहून कुटुंबीयांना मोठा धक्का बसला आणि त्यांनी मुलीकडे चौकशी केली असता, तिने सर्व हकीकत सांगितली.
पोलिसांची कारवाई आणि आरोपींना अटक
पीडितेच्या कुटुंबीयांनी तात्काळ कल्याणच्या महात्मा फुले चौक पोलीस ठाण्यात तक्रार दाखल केली. पोलिसांनी घटनेचे गांभीर्य ओळखून तातडीने तपास सुरू केला आणि राहुल भोईर, देवा पाटील, अजित सुर्वसे, गौरव सुर्वसे, हर्षल पोळसे, जयेश मोरे आणि किरण सुर्वसे या सातही आरोपींना अटक केली.
सर्व आरोपी हे मुरबाड आणि भिवंडी परिसरातील श्रीमंत कुटुंबातील असल्याचे समोर आले आहे. पोलिसांनी त्यांच्यावर पोक्सो कायद्यांतर्गत गुन्हा दाखल केला आहे. मंगळवारी त्यांना कल्याणच्या विशेष पोक्सो न्यायालयात हजर केले असता, न्यायालयाने सर्वांना आठ दिवसांची पोलीस कोठडी सुनावली आहे. या प्रकरणात आणखी कोणी सहभागी आहे का, याचा पोलीस सध्या तपास करत आहेत.