मुंबई: सुपरस्टार रजनीकांतचा कुली चित्रपट… नावापुढे कुठल्याही विशेषणाची गरज नाही. वयाची सत्तरी ओलांडली तरी त्यांची क्रेझ तसूभरही कमी झालेली नाही. थिएटरमध्ये त्यांची एंट्री झाल्यावर टाळ्या-शिट्ट्यांचा कडकडाट होतो आणि चाहते देवाप्रमाणे उभे राहून आदराने स्वागत करतात. हेच दृश्य सध्या देशभरातील चित्रपटगृहांमध्ये पुन्हा एकदा पाहायला मिळत आहे, निमित्त आहे त्यांच्या ‘कुली’ या नव्या चित्रपटाचे.
‘कुली’ने प्रदर्शनापूर्वीच ॲडव्हान्स बुकिंगमध्ये १०० कोटींचा टप्पा पार करत अनेक विक्रम मोडीत काढले आहेत. पहाटेपासून सुरू होणारे शो हाऊसफुल होत असून, तिकिटांचे वाढीव दरही चाहत्यांच्या उत्साहापुढे फिके पडत आहेत. केवळ रजनीकांतच नाही, तर आजच्या पिढीचा लोकप्रिय दिग्दर्शक लोकेश कनगराज याच्या दिग्दर्शनामुळे चित्रपटाची उत्सुकता शिगेला पोहोचली आहे. पाहूयात ‘कुली’च्या या अभूतपूर्व यशामागील ५ प्रमुख कारणे.
१.कुली चित्रपट ‘थलायवा’ रजनीकांतचा स्वॅग आणि ऑरा
रजनीकांत यांचा चित्रपट हिट होणे हे समीकरण ठरलेले असले तरी, प्रत्येक वेळी तो रेकॉर्डब्रेक यश मिळवतोच असे नाही. पण ‘कुली’मध्ये रजनीकांत यांचा तोच जुना ‘लार्जर दॅन लाईफ’ अंदाज पाहायला मिळत आहे. त्यांची विशिष्ट चाल, संवादफेक आणि जबरदस्त ॲक्शन सीन्स चाहत्यांना पुन्हा एकदा भारावून टाकत आहेत. या वयातही त्यांचा पडद्यावरील वावर आणि स्वॅग तरुणांना लाजवणारा आहे, हीच गोष्ट प्रेक्षकांना चित्रपटगृहांकडे खेचून आणत आहे.
२. दिग्दर्शक लोकेश कनगराजची जादू
आतापर्यंत केवळ पाच चित्रपट दिग्दर्शित केलेल्या लोकेश कनगराजने दाक्षिणात्य चित्रपटसृष्टीत स्वतःचे वेगळे स्थान निर्माण केले आहे. ‘कैथी’, ‘विक्रम’ आणि ‘लिओ’ सारख्या दर्जेदार चित्रपटांमुळे त्याच्या नावाची एक वेगळी क्रेझ आहे. त्याची वेगळी स्टोरी टेलिंग, अनपेक्षित इंटरव्हल ट्विस्ट आणि प्रत्येक पात्राला दिलेला न्याय ही त्याच्या दिग्दर्शनाची खासियत आहे. कमल हसन यांना ‘विक्रम’मधून दमदार पुनरागमन करून देणाऱ्या लोकेशने रजनीकांत यांना पडद्यावर कसे सादर केले आहे, हे पाहण्याची उत्सुकता प्रेक्षकांमध्ये प्रचंड आहे.
३. खऱ्या अर्थाने ‘पॅन-इंडिया’ चित्रपट
‘पॅन-इंडिया’ म्हणजे केवळ उत्तर आणि दक्षिण भारतात प्रमोशन करणे नव्हे, तर विविध इंडस्ट्रीतील कलाकारांना एकत्र आणणे, हे ‘कुली’ने दाखवून दिले आहे. या चित्रपटात कॉलीवूडचे रजनीकांत, टॉलीवूडचे नागार्जुन, सँडलवूडचे उपेंद्र, मॉलीवूडचे सौबिन शाहिर आणि बॉलिवूडचे आमीर खान (विशेष भूमिकेत) एकत्र आले आहेत. यामुळे प्रत्येक इंडस्ट्रीतील कलाकारांचे चाहते आपोआपच चित्रपटाकडे आकर्षित झाले असून, कोणत्याही मोठ्या प्रमोशनशिवाय ‘कुली’ खऱ्या अर्थाने पॅन-इंडिया चित्रपट ठरला आहे.
४. अनिरुद्ध रविचंदरचे दमदार संगीत
‘व्हाय धिस कोलावेरी डी’ पासून प्रसिद्धी मिळवलेला संगीतकार अनिरुद्ध रविचंदर आजच्या घडीला दाक्षिणात्य चित्रपटसृष्टीतील सर्वात यशस्वी संगीतकारांपैकी एक आहे. ‘विक्रम’ आणि ‘जेलर’ मधील त्याचे पार्श्वसंगीत (BGM) प्रचंड गाजले होते. ‘कुली’मध्येही त्याने दिलेले संगीत आणि पार्श्वसंगीत चित्रपटाचा प्रभाव द्विगुणीत करते. त्याचे संगीत हे केवळ ऐकण्यापुरते मर्यादित नसून, चित्रपटगृहात अनुभवण्यासारखे असते, ज्यामुळे प्रेक्षकांचा थरार आणखी वाढतो.
५. ‘LCU’ कनेक्शनची उत्सुकता
दिग्दर्शक लोकेश कनगराजने आपल्या चित्रपटांमधून ‘लोकेश सिनेमॅटिक युनिव्हर्स’ (LCU) तयार केले आहे. ‘कैथी’, ‘विक्रम’ आणि ‘लिओ’ हे चित्रपट एकमेकांशी जोडलेले आहेत. त्यामुळे ‘कुली’ हा चित्रपट LCU चा भाग आहे की नाही, याबाबत चाहत्यांमध्ये प्रचंड उत्सुकता होती. खुद्द लोकेशने हा स्वतंत्र चित्रपट असल्याचे स्पष्ट केले असले तरी, त्याच्या दिग्दर्शन शैलीमुळे आणि अनपेक्षित ट्विस्टमुळे चाहते शेवटपर्यंत काहीतरी कनेक्शनची अपेक्षा करत आहेत. ही उत्सुकता देखील प्रेक्षकांना चित्रपटगृहात खेचून आणण्यास कारणीभूत ठरली आहे.
एकंदरीत, दमदार ॲक्शन, इमोशन्स आणि पैसा वसूल मनोरंजन देणारा ‘कुली’ आणखी काही आठवडे बॉक्स ऑफिसवर धुमाकूळ घालणार हे निश्चित आहे.