म्हाडा लॉटरी २०२५ पुणेकरांसाठी मोठी बातमी! म्हाडाची ४,१८६ घरांची भव्य लॉटरी जाहीर, १९ सप्टेंबरपासून अर्ज सुरु

म्हाडा लॉटरी २०२५

पुणे: स्वतःच्या हक्काच्या घराचे स्वप्न पाहणाऱ्या पुणे, पिंपरी-चिंचवड आणि पुणे महानगर प्रदेश विकास प्राधिकरण (PMRDA) परिसरातील नागरिकांसाठी आनंदाची बातमी आहे. महाराष्ट्र गृहनिर्माण व क्षेत्रविकास मंडळाच्या (म्हाडा) पुणे विभागातर्फे ४,१८६ घरांची भव्य सोडत जाहीर करण्यात आली आहे. या सोडतीसाठीची ऑनलाईन अर्ज नोंदणी प्रक्रिया १९ सप्टेंबर २०२५ पासून सुरू होणार आहे.

म्हाडा पुणे मंडळाचे सभापती श्री. शिवाजी आढळराव पाटील आणि मुख्य अधिकारी श्री. राहुल कृष्णाजी साकोरे यांनी ही घोषणा केली. या अंतर्गत प्रधानमंत्री आवास योजना (PMAY), सामाजिक गृहनिर्माण योजना आणि सर्वसमावेशक गृहनिर्माण योजनांमधील सदनिका विक्रीसाठी उपलब्ध असणार आहेत.

विविध उत्पन्न गटांसाठी संधी

ही लॉटरी अत्यल्प (EWS), अल्प (LIG), मध्यम (MIG) आणि उच्च (HIG) अशा सर्व उत्पन्न गटांतील नागरिकांसाठी आहे. पुणे महानगर प्रदेश (PMRDA) क्षेत्रासाठी उत्पन्न मर्यादा खालीलप्रमाणे निश्चित करण्यात आली आहे:

• अत्यल्प उत्पन्न गट (EWS): वार्षिक उत्पन्न ६ लाख रुपयांपर्यंत.
• अल्प उत्पन्न गट (LIG): वार्षिक उत्पन्न ९ लाख रुपयांपर्यंत.
• मध्यम उत्पन्न गट (MIG): वार्षिक उत्पन्न १२ लाख रुपयांपर्यंत.
• उच्च उत्पन्न गट (HIG): कमाल उत्पन्न मर्यादा नाही.

म्हाडा लॉटरी २०२५ सोडतीचे महत्त्वाचे वेळापत्रक

• ऑनलाईन अर्ज नोंदणीची सुरुवात: १९ सप्टेंबर २०२५ (दुपारी १२:३० पासून)
• ऑनलाईन अर्ज करण्याची शेवटची तारीख: २९ ऑक्टोबर २०२५ (रात्री ११:५९ पर्यंत)
• ऑनलाईन रक्कम भरण्याची शेवटची तारीख: ३१ ऑक्टोबर २०२५ (रात्री ११:५९ पर्यंत)
• NEFT/RTGS द्वारे अनामत रक्कम भरण्याची अंतिम तारीख: ०९ नोव्हेंबर २०२५
• सोडतीचा दिनांक: २१ नोव्हेंबर २०२५ (दुपारी १२:०० वाजता)
• यशस्वी अर्जदारांची यादी प्रसिद्ध: २१ नोव्हेंबर २०२५ (सायंकाळी ६:०० वाजता)

अर्ज प्रक्रिया आणि अनामत रक्कम

इच्छुक अर्जदारांनी अर्ज करण्यापूर्वी housing.mhada.gov.in किंवा mhada.gov.in या संकेतस्थळांवरील माहिती पुस्तिका काळजीपूर्वक वाचावी. अर्ज करण्यासाठी ६०० रुपये आणि १०८ रुपये जीएसटी असे एकूण ७०८ रुपये (विनापरतावा) शुल्क आकारले जाईल.

विविध उत्पन्न गटांसाठी अनामत रक्कम (Deposit Amount) खालीलप्रमाणे आहे:

• अत्यल्प उत्पन्न गट (EWS): रु. १५,०००
• अल्प उत्पन्न गट (LIG): रु. २०,०००
• मध्यम उत्पन्न गट (MIG): रु. ७५,०००
• उच्च उत्पन्न गट (HIG): रु. १,००,०००

‘प्रथम येणाऱ्यास प्रथम प्राधान्य’ तत्वावरील घरांसाठी bookmyhome.mhada.gov.in हे स्वतंत्र संकेतस्थळ विकसित करण्यात आले आहे. अधिक माहितीसाठी अर्जदार म्हाडाच्या पुणे येथील कार्यालयात किंवा लॉटरी हेल्पलाइन क्रमांक ०२२-६९४६८१०० वर संपर्क साधू शकतात.