चिपळूण: येथील धामणवणे खोतवाडी गावात एका सेवानिवृत्त शिक्षिकेची निर्घृण हत्या झाल्याची धक्कादायक घटना उघडकीस आली आहे. वर्षा जोशी (वय ६३) असे मृत शिक्षिकेचे नाव असून, गुरुवारी, ७ ऑगस्ट रोजी त्यांच्या राहत्या घरी त्यांचा मृतदेह आढळून आला. अत्यंत गुंतागुंतीच्या वाटणाऱ्या या हत्याकांडाचा उलगडा करण्यात चिपळूण पोलिसांना यश आले असून, बादलीत सापडलेल्या एका मोबाईल फोनने तपासाला निर्णायक कलाटणी दिली.
वर्षा जोशी यांची हत्या कशी झाली जाणून घ्या.
चिपळूण हत्या घटनेचा तपशील
वर्षा जोशी या जिल्हा परिषद शाळेतून सेवानिवृत्त झाल्या होत्या आणि आपल्या घरी एकट्याच राहत होत्या. त्यांच्या एका मैत्रिणीने वारंवार फोन करूनही त्या उचलत नसल्याने, शेजाऱ्यांना त्यांच्या घरी जाऊन चौकशी करण्याची विनंती केली. शेजारी घरी पोहोचले असता, त्यांना वर्षा जोशी यांचा मृतदेह अत्यंत विदारक अवस्थेत आढळला. त्यांचे हात बांधलेले होते आणि अंगावरचे काही कपडे अस्ताव्यस्त होते. या घटनेने संपूर्ण परिसरात एकच खळबळ उडाली.
पोलिसांपुढील आव्हान
घटनेची माहिती मिळताच चिपळूण पोलीस तात्काळ घटनास्थळी दाखल झाले. प्रथमदर्शनी हा गुन्हा अत्यंत नियोजनबद्ध पद्धतीने केल्याचे दिसून आले. घराचा दरवाजा आतून उघडण्यात आला होता, ज्यामुळे झटापटीचा कोणताही पुरावा नव्हता. विशेष म्हणजे, घरातून सीसीटीव्हीचा डीव्हीआर (DVR) गायब होता, ज्यामुळे आरोपीची ओळख पटवणे पोलिसांसाठी एक मोठे आव्हान बनले होते. आरोपीने आपण ओळखले जाऊ नये यासाठी सीसीटीव्हीचा डीव्हीआरच लंपास केला होता. तसेच, जोशी यांच्या अंगावरील दागिने जसेच्या तसे होते, ज्यामुळे हत्येमागील नेमका उद्देश काय असावा, याबाबत संभ्रम निर्माण झाला होता.
तपासाला कलाटणी देणारा ‘तो’ फोन
पोलिसांनी तपासाची चक्रे वेगाने फिरवली. फॉरेन्सिक टीम आणि श्वान पथकाला पाचारण करण्यात आले. ‘रॅम्बो’ नावाच्या श्वानाने घरापासून जंगलाच्या दिशेने धाव घेतल्याने सुरुवातीला आरोपी जंगलात पळाल्याचा संशय होता. मात्र, घराची झडती घेत असताना पोलिसांना एका पाण्याच्या बादलीत वर्षा जोशी यांचा मोबाईल फोन सापडला. हाच या प्रकरणातील सर्वात महत्त्वाचा दुवा ठरला.
आरोपीने पुरावा नष्ट करण्याच्या उद्देशाने फोन पाण्यात टाकला होता. पोलिसांनी तात्काळ सिम कार्ड काढून त्याचे सीडीआर (Call Detail Records) तपासले. तपासात एका विशिष्ट नंबरवरून जोशी यांना अनेकदा फोन आल्याचे निष्पन्न झाले. हत्येपूर्वीही त्याच नंबरवरून फोन आला होता. या माहितीच्या आधारे पोलिसांनी संशयाची सुई जयेश गोंधळेकर नावाच्या व्यक्तीवर केंद्रित केली.
ओळखीचाच निघाला मारेकरी
जयेश गोंधळेकर हा गोंधळे गावचा रहिवासी असून, जोशी यांचे सासरही त्याच गावातले होते. पतीच्या निधनानंतर जोशी धामणवणेवाडीत स्थायिक झाल्या होत्या, परंतु एकाच गावचे असल्याने त्यांची आणि जयेशची ओळख होती. जयेशचा ट्रॅव्हल्सचा व्यवसाय होता आणि फिरण्याची आवड असलेल्या वर्षा जोशी अनेकदा त्याच्याच गाडीने प्रवास करत असत. यातूनच त्यांची ओळख अधिक दृढ झाली होती.
वर्षा जोशी एकट्याच राहतात, त्यांना कोणी वारसदार नाही आणि त्यांची आर्थिक परिस्थिती चांगली आहे, याची जयेशला पूर्ण कल्पना होती. याच माहितीच्या आधारे त्याने चोरी आणि हत्येचा कट रचला.
हत्येचा घटनाक्रम
योजनेनुसार, जयेश आपल्या एका साथीदारासह जोशी यांच्या घरी पोहोचला. ओळखीचा असल्याने जोशी यांनी त्याला सहज घरात घेतले. मात्र, घरात शिरताच जयेशने आपले खरे रूप दाखवले. त्याने जोशी यांचे हातपाय बांधले आणि तोंडात कापडाचा बोळा कोंबून त्यांचा श्वास गुदमरवून खून केला.
हत्येनंतर, प्रकरणाला वेगळे वळण देण्यासाठी त्याने जोशी यांच्या अंगावरचे काही कपडे उतरवले आणि दागिने मात्र तसेच ठेवले. शवविच्छेदन अहवालात लैंगिक अत्याचाराचा कोणताही प्रकार झाला नसल्याचे आणि मृत्यू श्वास गुदमरल्याने झाल्याचे स्पष्ट झाले.
पोलिसांची कौतुकास्पद कामगिरी
सीडीआर अहवालातून मिळालेल्या माहितीच्या आधारे, पोलिसांनी घटनेची माहिती मिळाल्यानंतर अवघ्या दोन तासांतच जयेश गोंधळेकरला ताब्यात घेतले. सुरुवातीला त्याने उडवाउडवीची उत्तरे दिली, परंतु पोलिसी खाक्या दाखवताच तो पोपटासारखा बोलू लागला आणि त्याने गुन्ह्याची कबुली दिली. पोलिसांनी त्याच्याकडून चार सोन्याच्या बांगड्या आणि २७,००० रुपयांची रोकड जप्त केली आहे.
आरोपीने ग्लोज घालून आणि सीसीटीव्ही डीव्हीआर गायब करून पोलिसांची दिशाभूल करण्याचा पुरेपूर प्रयत्न केला होता. मात्र, बादलीत टाकलेला मोबाईल फोन त्याच्याच अंगलट आला. पोलिसांनी जयेशला अटक केली असून, त्याच्या साथीदारालाही ताब्यात घेतले आहे. मात्र, तपासाच्या गोपनीयतेसाठी त्याचे नाव अद्याप जाहीर करण्यात आलेले नाही.
अत्यंत अवघड आणि दिशाभूल करणाऱ्या या हत्याकांडाचा छडा चिपळूण पोलिसांनी केवळ काही तासांत लावून कौतुकास्पद कामगिरी केली आहे. या घटनेमुळे परिसरात हळहळ व्यक्त होत आहे.