मालाड: मुंबईतील मालाड परिसरातून एक अत्यंत धक्कादायक घटना समोर आली आहे, जिथे एका महिलेने राजश्री अहिरे हिने आपल्या प्रियकराच्या मदतीने पतीच्या हत्येचा कट रचला आणि अपघाताचा बनाव केला. ४० वर्षीय भरत अहिरे यांचा उपचारादरम्यान मृत्यू झाल्यानंतर, त्यांच्याच १३ वर्षीय मुलीने दिलेल्या एका साक्षीमुळे या संपूर्ण प्रकरणाचा उलगडा झाला. आरे पोलिसांनी आरोपी पत्नी राजश्री हिला अटक केली असून, तिचा प्रियकर आणि त्याचा मित्र फरार आहेत.
राजश्री अहिरे नेमके प्रकरण काय आहे?
गोरेगावच्या आरे कॉलनीत राहणारे भरत अहिरे आणि त्यांची पत्नी राजश्री हे मेकअप आर्टिस्ट म्हणून काम करत होते. त्यांना दोन मुली आणि एक लहान मुलगा आहे. १५ जुलै रोजी, राजश्रीने तिच्या कुटुंबीयांना सांगितले की भरतचा अपघात झाला आहे. मात्र, गंभीर जखमी अवस्थेत असूनही तिने भरतला रुग्णालयात दाखल न करता तीन दिवस घरातच डांबून ठेवले.
भरतच्या १३ वर्षांच्या मोठ्या मुलीने, किशोरीने, आपल्या वडिलांची गंभीर अवस्था पाहून नातेवाईकांना याची माहिती दिली. यानंतर नातेवाईकांनी तातडीने भरतला मालाडच्या एका सुपर स्पेशालिटी रुग्णालयात दाखल केले आणि पोलिसांना या घटनेबद्दल कळवले. पोलिसांनी तपासाला सुरुवात केली, पण त्यांना भरतच्या अपघाताचा कोणताही पुरावा सापडला नाही. ज्या गाडीवरून तो बाहेर पडला होता, त्या गाडीवर साधा ओरखडाही नव्हता. त्यामुळे पोलिसांचा संशय अधिकच गडद झाला. विशेष म्हणजे, रुग्णालयात उपचार घेत असलेल्या भरतनेही आपला अपघातच झाल्याचे पोलिसांना सांगितले होते, ज्यामुळे हे प्रकरण अधिकच गुंतागुंतीचे झाले होते.
मुलीच्या एका जबाबाने उलगडले रहस्य
अखेर, ५ ऑगस्ट रोजी उपचारादरम्यान भरतचा मृत्यू झाला. यानंतर, पोलिसांनी पुन्हा एकदा नव्याने तपास सुरू केला. त्यांनी भरतची मुलगी किशोरीला विश्वासात घेऊन तिची चौकशी केली असता, तिने दिलेल्या जबाबाने सर्वांनाच धक्का बसला. किशोरीने पोलिसांना सांगितले की, “१५ जुलैच्या रात्री १० वाजता, दोन व्यक्ती माझ्या वडिलांना बेदम मारहाण करत होते आणि माझी आई तिथेच उभी राहून सर्व काही पाहत होती. तिने त्यांना अडवण्याचा कोणताही प्रयत्न केला नाही.”
हत्येमागील धक्कादायक कट
किशोरीच्या या साक्षीनंतर पोलिसांनी राजश्रीचे कॉल रेकॉर्ड तपासले. यातून तिचे चंद्रशेखर पडायाची नावाच्या व्यक्तीसोबत अनैतिक संबंध असल्याचे स्पष्ट झाले. राजश्रीला सुरुवातीपासूनच श्रीमंत जीवनशैली, महागड्या गाड्या आणि दागिन्यांची आवड होती, यावरून तिचे आणि भरतचे सतत वाद होत असत. याच दरम्यान तिची ओळख चंद्रशेखरशी झाली आणि त्यांच्या मैत्रीचे रूपांतर प्रेमसंबंधात झाले.
हे संबंध भरतला कळताच त्यांच्यातील भांडणे वाढली. या रोजच्या कटकटीला कंटाळून राजश्री आणि चंद्रशेखरने भरतला कायमचे आपल्या मार्गातून दूर करण्याचा निर्णय घेतला. सुरुवातीला राजश्रीने भरतविरोधात मानसिक आणि शारीरिक छळाचा खोटा गुन्हा दाखल केला, जेणेकरून घटस्फोट घेऊन तिला मोकळे होता येईल, पण तिचा हा डाव फसला.
असा रचला हत्येचा कट
१५ जुलै रोजी, चंद्रशेखरने भरतला बोलण्याच्या बहाण्याने आरे कॉलनीतील एका सार्वजनिक शौचालयाजवळ बोलावले. तिथे चंद्रशेखर आणि त्याचा मित्र रंगा यांनी मिळून भरतला काठ्या आणि बुक्क्यांनी बेदम मारहाण केली. हा सर्व प्रकार राजश्रीच्या डोळ्यासमोर घडत होता. या मारहाणीत भरत गंभीर जखमी झाला.
यानंतर, पकडले जाण्याच्या भीतीने राजश्रीने जखमी भरतला रुग्णालयात नेण्याऐवजी घरी आणले आणि तीन दिवस कोंडून ठेवले. तिने भरतला धमकी दिली की, “जर पोलिसांना खरे सांगितले, तर हा तुझा शेवटचा दिवस असेल.” याच भीतीमुळे भरतने पोलिसांना अपघाताची खोटी कहाणी सांगितली.
पोलिसांनी आता राजश्री अहिरेला अटक केली असून, तिचा प्रियकर चंद्रशेखर आणि त्याचा मित्र रंगा हे दोघेही फरार आहेत. पोलीस त्यांचा कसून शोध घेत आहेत. एका १३ वर्षांच्या मुलीच्या धाडसामुळे तिच्या वडिलांना न्याय मिळाला, पण आईच्या या क्रूर कृत्यामुळे तिन्ही मुले आज पोरकी झाली आहेत, याबद्दल सर्वत्र हळहळ व्यक्त केली जात आहे.