कोल्हापूर: हातकणंगले तालुक्यातील भादोले गावात २९ सप्टेंबरच्या रात्री ९ ते ९:३० च्या सुमारास एक अत्यंत थरारक आणि धक्कादायक घटना घडली. अनैतिक संबंधातून पतीनेच आपल्या पत्नीचा क्रूरपणे खून केल्याची ही घटना आहे. खुनाच्या घटनेनंतर आरोपीने थेट आपल्या घरी धाव घेत आई-वडिलांसमोर गुन्ह्याची कबुली दिली आणि तो पळून गेला, ज्यामुळे गावात एकच खळबळ उडाली.
नेमके काय घडले?
भादोले येथील प्रशांत पाटील (गॅरेज कामगार) आणि त्यांची पत्नी रोहिणी पाटील (दोघी लहान मुलींची आई) यांच्या संसारात प्रशांतच्या एका तृतीयपंथीयासोबत असलेल्या अनैतिक संबंधांमुळे गेल्या काही वर्षांपासून सतत वाद होते.
सोमवारी, २९ सप्टेंबर रोजी रोहिणी वडिलांना भेटण्यासाठी सांगली जिल्ह्यातील ढवळी माहेरी गेली होती. प्रशांतही तिच्यासोबत गेला होता. संध्याकाळी दोघे भादोले गावाकडे परत येत असताना, रात्री ८:३० च्या सुमारास कोरेगाव-भादोले रस्त्यावर एका निर्जन ठिकाणी प्रशांतने लघुशंका करण्याच्या बहाण्याने गाडी थांबवली.
डोळ्यात तिखट, वार कोयत्याचे:
- गाडी थांबताच प्रशांतने खिशातून लाल तिखट (चटणी) काढून रोहिणीच्या डोळ्यात फेकले.
- डोळ्यात तिखट गेल्यामुळे रोहिणीला प्रतिकार करणे किंवा मदत मागणे शक्य झाले नाही.
- याच संधीचा फायदा घेत प्रशांतने गाडीला लावलेला कोयता काढला आणि रोहिणीवर सपासप वार केले.
- रोहिणीने आरडाओरडा करून प्रतिकार करण्याचा प्रयत्न केला, मात्र निर्जन रस्त्यामुळे तिचा आवाज कुणालाही ऐकू गेला नाही.
- कोयत्याच्या वर्मी घावांनी रोहिणीचा जागीच मृत्यू झाला.
घरी धाव, आई-वडिलांपुढे कबुली
पत्नीचा खून केल्यानंतर प्रशांतने मृतदेह तिथेच टाकून पळ काढला आणि थेट भादोले गावातील आपले घर गाठले. तो घाबरलेल्या अवस्थेत, अंगावर रक्ताचे डाग घेऊन घरी पोहोचला. त्याने आपल्या वृद्ध आई-वडिलांसमोर “मी रोहिणीचा खून केला आहे, माझ्या मुलींकडे लक्ष ठेवा, मी आता सहा महिने येणार नाही” अशी कबुली दिली आणि घरातून पसार झाला.
प्रशांतच्या कबुलीमुळे हादरलेल्या गावकरी आणि आई-वडिलांनी तात्काळ वडगाव पोलिसांना संपर्क साधून घटनेची माहिती दिली.
पोलिसांची कारवाई आणि खुनाचे कारण उघड
वडगाव पोलिसांनी तात्काळ खुनाच्या ठिकाणी धाव घेतली. दरम्यान, कोल्हापूर गुन्हे शाखेचे पोलीस निरीक्षक रवींद्र कळमकर आणि त्यांच्या पथकाने तांत्रिक बाबींच्या आधारे तपास सुरू केला आणि रात्री दीडच्या सुमारास प्रशांत पाटीलला कोल्हापूर जिल्ह्याच्या हद्दीतून अटक केली.
पोलिसांनी चौकशी केली असता, प्रशांतने खुनाची कबुली दिली. सुरुवातीला त्याने रोहिणीच्या अनैतिक संबंधांवर संशय घेऊन खून केल्याचे सांगितले. मात्र, पोलिसांनी रोहिणीचे कुटुंबीय आणि गावात चौकशी केली असता, प्रशांतचेच एका तृतीयपंथीयासोबत गेल्या ४-५ वर्षांपासून अनैतिक संबंध असल्याचे समोर आले. याच संबंधांमुळे पती-पत्नीमध्ये सतत वाद होत असत. रोहिणी वारंवार संबंध तोडण्यासाठी सांगत होती, पण प्रशांतने ऐकले नाही. याच वादातून प्रशांतने क्रूरपणे रोहिणीला संपवल्याचे उघड झाले.
रोहिणीच्या नातेवाईकांनी खुनात प्रशांतसोबत त्याला साथ देणारे तृतीयपंथीही सामील असल्याचा संशय व्यक्त केला आहे.
आरोपी प्रशांत पाटीलला न्यायालयात हजर केले असता, त्याला ३ ऑक्टोबरपर्यंत पोलीस कोठडी सुनावण्यात आली आहे.
प्रशांतने पूर्वनियोजित कट रचून पत्नीला संपवले की, हे क्षणिक रागातून घडले, याचा पुढील तपास पोलीस करत आहेत.