मुंबई : बांगलादेशातून चांगल्या आयुष्याच्या आमिषाने मुंबईत आणलेल्या अल्पवयीन मुलीला गुजरात आणि वसईत डांबून ठेवले होते. पोलिसांनी ९ आरोपींना अटक केली असून, एका मोठ्या मानवी तस्करीच्या जाळ्याचा पर्दाफाश केला आहे.
वसई: एका परीक्षेत नापास झाल्याने घरच्यांच्या भीतीने घरातून पळून आलेल्या बांगलादेशातील १२ वर्षीय मुलीला मुंबईतील झगमगत्या दुनियेची स्वप्ने दाखवून भारतात आणण्यात आले. मात्र, येथे तिची स्वप्ने धुळीस मिळाली आणि ती एका मोठ्या सेक्स रॅकेटच्या जाळ्यात अडकली. गेल्या तीन महिन्यांत तिच्यावर गुजरात आणि वसईत मिळून २०० हून अधिक वेळा पाशवी अत्याचार झाल्याची हृदयद्रावक घटना उघडकीस आली आहे. मीरा-भाईंदर, वसई-विरार पोलिसांच्या मानवी तस्करी विरोधी पथकाने (Anti-Human Trafficking Unit) या रॅकेटचा पर्दाफाश करत मुलीची सुटका केली आहे.
अशी झाली सुटका
‘एक्सोडस रोड इंडिया फाउंडेशन’चे श्याम कांबळे आणि ‘हार्मनी फाउंडेशन’चे अब्राहम मठाई या दोन स्वयंसेवी संस्थांना वसईत एका अल्पवयीन मुलीवर अत्याचार होत असल्याची माहिती मिळाली. त्यांनी तात्काळ ही माहिती मीरा-भाईंदर, वसई-विरार पोलिसांना दिली. मिळालेल्या माहितीनुसार, २६ जुलै रोजी पोलिसांनी वसईच्या नायगाव परिसरातील चंद्रिका अपार्टमेंटमध्ये छापा टाकला आणि १२ वर्षीय पीडित मुलीसह एका २० वर्षीय तरुणीची सुटका केली. यावेळी तीन बांगलादेशी आरोपींना अटक करण्यात आली.
परीक्षेत नापास झाली आणि आयुष्यच बदललं
पीडित मुलगी प्रचंड घाबरलेल्या अवस्थेत होती. पोलिसांनी तिला विश्वासात घेऊन चौकशी केली असता, तिने आपल्यासोबत घडलेला सर्व धक्कादायक प्रकार कथन केला. ती बांगलादेशात शाळेत शिकत असताना एका परीक्षेत नापास झाली. आई-वडील ओरडतील या भीतीने तिने घर सोडले. त्याचवेळी तिला एक बांगलादेशी महिला भेटली. तिने मुलीच्या असहाय्यतेचा फायदा उचलत तिला मुंबईत भरपूर पैसे कमावण्याचे आणि चांगले आयुष्य देण्याचे आमिष दाखवले. तिच्या गोड बोलण्याला भुलून ही मुलगी भारतात येण्यास तयार झाली.
स्वप्नांच्या मुंबईत नरकयातना
त्या महिलेने पीडितेला बांगलादेशातून कोलकाता येथे आणले, जिथे तिचे बनावट आधार कार्ड आणि इतर कागदपत्रे तयार करण्यात आली. तिथून तिला विमानाने मुंबईत आणून थेट नायगाव येथील एका खोलीत डांबले, जिथे आधीच ७-८ मुली होत्या. तिथे पोहोचताच एका व्यक्तीने तिला इंजेक्शन देऊन तिच्यावर अत्याचार केला आणि त्याचा व्हिडिओ बनवून तिला ब्लॅकमेल करण्यास सुरुवात केली.
तिने पळून जाण्याचा प्रयत्न केला असता, तिला बेदम मारहाण करून अंगावर चटके देण्यात आले. धक्कादायक म्हणजे, मुलगी अल्पवयीन असल्याने तिला लवकर वयात आणण्यासाठी हार्मोनल इंजेक्शन्स दिल्याचेही समोर आले आहे. येथून तिला एजंट्समार्फत वेगवेगळ्या ठिकाणी, अगदी गुजरातच्या नडियादमधील हॉटेल्स आणि रिसॉर्टमध्ये नेऊन तिच्यावर पाशवी अत्याचार करण्यात आले. जवळपास दोन महिन्यांत तिच्यावर २०० पेक्षा जास्त लोकांनी अत्याचार केले.
पोलिसांची कारवाई आणि आरोपी अटकेत
गुजरातवरून परत नायगावमध्ये आणले जात असतानाच पोलिसांनी छापा टाकून तिची सुटका केली. या प्रकरणात पोलिसांनी आतापर्यंत एकूण नऊ आरोपींना अटक केली आहे, ज्यापैकी सहा जण बांगलादेशी नागरिक आहेत. मोहम्मद खालिद बापारी आणि त्याची पत्नी रुबी बेगम हे या रॅकेटचे मुख्य सूत्रधार असल्याचे समोर आले आहे. गुजरात आणि अहमदनगर येथूनही काही आरोपींना अटक करण्यात आली आहे.
सर्व आरोपींवर भारतीय न्यायसंहितेची विविध कलमे आणि अनैतिक व्यापार प्रतिबंधक कायद्यानुसार (PITA Act) गंभीर गुन्हे दाखल करण्यात आले आहेत.
सध्या पीडित मुलगी पोलिसांच्या संरक्षणाखाली मुंबईतील एका रेस्क्यू फाउंडेशनमध्ये असून, तिचे समुपदेशन केले जात आहे. तिला लवकरच तिच्या घरी बांगलादेशात पाठवण्याची प्रक्रिया सुरू केली जाईल. ज्या महिलेने या मुलीला फसवून भारतात आणले, ती अद्याप फरार असून पोलीस तिचा आणि या रॅकेटच्या इतर सदस्यांचा शोध घेत आहेत. या घटनेने एका कोवळ्या मुलीचे आयुष्य उद्ध्वस्त झाल्याने सर्वत्र हळहळ व्यक्त होत आहे.