प्रमोद महाजन हत्याकांड: ‘घरातले सांभाळू शकले नाहीत’ टीकेनंतर १८ वर्षांपूर्वीचा थरार पुन्हा चर्चेत; पैशांसाठी ब्लॅकमेलिंग ते गोळीबार, काय घडले होते त्या दिवशी?

महाजन कुटुंबातील वाद पुन्हा उफाळला; प्रकाश महाजनांचा सणसनाटी आरोप, “प्रवीणने पैशांसाठी भावाचा जीव घेतला”

मुंबई:

“आज अनेक जण म्हणतात प्रमोद महाजन असते तर देशाचे पंतप्रधान झाले असते. पण माझा सवाल आहे, ज्यांना आमच्या घरातल्यांना निस्तरता आलं नाही, ते घराला सावरू शकले नाहीत, ते देशाला कसं सांभाळू शकले असते?” – दिवंगत नेते प्रमोद महाजन यांचे बंधू प्रवीण महाजन यांच्या पत्नी सारंगी महाजन यांनी नुकतेच हे विधान केले. पंकजा मुंडे यांना ‘बिघडलेली मुलगी’ संबोधत त्यांनी महाजन कुटुंबातील जुन्या वादाला पुन्हा तोंड फोडले आहे.

या टीकेला प्रमोद महाजन यांचे दुसरे बंधू प्रकाश महाजन यांनी सडेतोड उत्तर दिले. “प्रवीणने भावाच आयुष्य उद्धवस्त केलं. केवळ पैशांसाठी, लोभासाठी आणि स्वार्थासाठी हा खून झाला. प्रमोद महाजनांना ब्लॅकमेल केलं जात होतं,” असा सणसनाटी आरोप प्रकाश महाजन यांनी केला. या कौटुंबिक कलहामुळे १८ वर्षांपूर्वी संपूर्ण देशाला हादरवून सोडणारे प्रमोद महाजन हत्याकांड पुन्हा एकदा चर्चेच्या केंद्रस्थानी आले आहे.

२२ एप्रिल २००६: तो काळा शनिवार

वेळ: सकाळी ७:३० वाजता

स्थळ: ‘पूर्णा’ अपार्टमेंट, १४ वा मजला, वरळी, मुंबई

भाजपचे राष्ट्रीय नेते प्रमोद महाजन त्यांच्या ड्रॉइंग रूममध्ये बसून वर्तमानपत्र वाचत होते. घराची बेल वाजली. त्यांच्या पत्नी रेखा महाजन यांनी दार उघडले, तर समोर प्रमोद यांचे धाकटे बंधू प्रवीण महाजन उभे होते. दोन्ही भावांमध्ये संबंध ताणलेले होते. “मला भेटायला येताना माझ्या पीएची अपॉईंटमेंट घेऊन येत जा,” अशी स्पष्ट सूचना प्रमोद यांनी प्रवीणला दिली होती.

तरीही रेखा यांनी प्रवीणला घरात घेतले आणि त्या चहा करण्यासाठी किचनमध्ये गेल्या. प्रवीण सोफ्यावर बसला आणि त्याने तक्रारींचा पाढा वाचायला सुरुवात केली. “तुम्ही मला वेळ देत नाही, व्यवसायात मदत करत नाही,” असे तो म्हणाला.

प्रमोद महाजन यांनी पेपर बाजूला ठेवत शांतपणे उत्तर दिले, “काही महत्त्वाचं बोलायचं असेल, तर पीए कडून अपॉईंटमेंट घेऊन ये.”

वेळ: सकाळी ७:४० वाजता

प्रमोद महाजन यांचे हे वाक्य ऐकताच प्रवीण महाजनने क्षणार्धात आपल्याजवळ असलेले .३२ बोरचे पिस्तूल काढले आणि प्रमोद महाजन यांच्यावर पॉईंट ब्लँक रेंजवरून एकामागोमाग एक तीन गोळ्या झाडल्या. चौथी गोळी झाडण्याचा प्रयत्न केला, पण पिस्तूल जाम झाले.

गोळीबाराचा आवाज ऐकून रेखा महाजन धावत बाहेर आल्या. रक्ताच्या थारोळ्यात पडलेल्या पतीला पाहून त्यांना धक्का बसला. त्यांनी प्रवीणला ढकलत विचारले, “हे काय केलंस?”

“तुम्ही माझं ऐकलं नाहीत, आता भोगा,” असे थंडपणे उत्तर देत प्रवीण महाजन घरातून निघून गेला.

१३ दिवसांची झुंज आणि प्रवीणची शरणागती

प्रमोद महाजन गंभीर जखमी अवस्थेतही शुद्धीवर होते. त्यांनी रेखा यांना “खालच्या मजल्यावर जा आणि गोपीनाथला (गोपीनाथ मुंडे) बोलाव,” असे सांगितले. गोपीनाथ मुंडे, जावई आनंदराव आणि डॉ. विजय बंग तातडीने तिथे पोहोचले.

“मला लीलावती लांब पडेल, हिंदूजामध्ये घेऊन चला,” अशी सूचना स्वतः प्रमोद महाजन यांनीच केली. हिंदूजा रुग्णालयात पोहोचेपर्यंत ते शुद्धीत होते. त्यांनी डॉक्टरांना आपला रक्तगट (बी पॉझिटिव्ह) आणि मधुमेहाची माहितीही दिली.

मात्र, तीन गोळ्यांनी त्यांच्या यकृत, स्वादुपिंड आणि आतड्यांना गंभीर इजा केली होती. अंतर्गत रक्तस्राव प्रचंड झाला होता. डॉक्टरांनी शर्थीचे प्रयत्न केले, लंडनहून तज्ज्ञ डॉक्टरांना पाचारण करण्यात आले, अनेक शस्त्रक्रिया झाल्या. पण १३ दिवस मृत्यूशी झुंज दिल्यानंतर अखेर ३ मे २००६ रोजी प्रमोद महाजन यांची प्राणज्योत मालवली.

दुसरीकडे…

प्रमोद महाजनांवर गोळ्या झाडल्यानंतर प्रवीण महाजन शांतपणे जिन्यावरून खाली उतरला. पार्किंगमधील आपली कार सोडून तो चालतच वरळी पोलीस स्टेशनला गेला. सकाळी ८:३० वाजता त्याने पिस्तूल पोलिसांच्या हवाली केले आणि “मी माझा भाऊ प्रमोद महाजन याला गोळ्या घातल्या,” अशी कबुली मराठीत दिली.

खटला, शिक्षा आणि न उलगडलेलं गूढ

या प्रकरणाचा खटला मुंबई सत्र न्यायालयात चालला. प्रवीण महाजनने न्यायालयात सतत वेगवेगळे दावे केले. त्याने ‘माझा अल्बम’ नावाचे पुस्तक लिहून प्रमोद महाजनांवर चारित्र्यहननाचे आरोपही केले. मात्र, रेखा महाजन यांनी साक्ष देताना स्पष्ट सांगितले की, “प्रवीण पैसे मागत होता, वेळ मागत होता. अपॉईंटमेंट घेऊन येण्यास सांगितल्याचा राग मनात धरून त्याने गोळीबार केला.”

न्यायालयाने प्रवीण महाजनला जन्मठेपेची शिक्षा सुनावली. पण या हत्येमागील खरे कारण काय? हा निव्वळ क्षणिक राग होता, कौटुंबिक वाद होता की पैशांचा लोभ?

हे गूढ कायमचे गूढच राहिले, कारण नोव्हेंबर २००९ मध्ये १४ दिवसांच्या फर्लो रजेवर असताना प्रवीण महाजनला ब्रेन हॅमरेजचा त्रास झाला. तो कोमात गेला आणि ३ मार्च २०१० रोजी त्याचाही मृत्यू झाला.

हत्येमागचे षडयंत्र?

प्रवीणच्या मृत्यूने या प्रकरणावर पडदा पडला, पण त्यातील शंका कायम राहिल्या.

• प्रवीणचा मेसेज: गोळीबाराच्या सात दिवस आधी प्रवीणने प्रमोद महाजनांना एक धमकीवजा मेसेज पाठवला होता – “अब याचना नही रण होगा, जीवन विजय के साथ या फिर मरण होगा।”
• पूनम महाजन यांचा दावा: नोव्हेंबर २०२४ मध्ये प्रमोद महाजन यांच्या कन्या पूनम महाजन यांनी, “ती गोळी फक्त एका माणसाच्या रागाची नव्हती, त्यामागे मोठे षडयंत्र होते. त्या बंदुकीचे पैसे सुद्धा माझ्या वडिलांनीच दिले होते,” असा गौप्यस्फोट केला होता.
• प्रकाश महाजनांचा आरोप: आणि आता प्रकाश महाजन यांनी, “प्रवीण पैशांसाठी प्रमोदला ब्लॅकमेल करत होता,” असा थेट आरोप केल्याने या षडयंत्राच्या चर्चेला पुन्हा उधाण आले आहे.

प्रमोद महाजन यांच्या हत्येला १८ वर्षे उलटून गेली असली, तरी त्या गोळीबारामागील खरे ‘कारण’ आणि ‘षडयंत्र’ महाजन कुटुंबातील या ताज्या वादामुळे पुन्हा एकदा महाराष्ट्राच्या राजकारणात चर्चेचा विषय ठरले आहे.