Pune : पुण्यातील सुसगाव परिसरात ‘ब्रह्मांड नायक मठ’ चालवणाऱ्या प्रसाद उर्फ दादा भीमराव तामदार या भोंदूबाबाला बावधन पोलिसांनी अटक केली आहे. स्वतःकडे दिव्यशक्ती असल्याचा दावा करून, तामदार हा भक्तांच्या मोबाईलमध्ये गुप्तपणे स्पाय ॲप इन्स्टॉल करून त्यांच्यावर पाळत ठेवत होता. या ॲपद्वारे त्यांच्या खासगी क्षणांचे चित्रीकरण करून त्यांना ब्लॅकमेल करत, त्यांच्यावर लैंगिक अत्याचार आणि आर्थिक फसवणूक केल्याचा आरोप त्याच्यावर आहे.
या प्रकरणी एका बांधकाम व्यावसायिकाने तक्रार दिल्यानंतर हे धक्कादायक वास्तव समोर आले. आतापर्यंत अनेक पुरुष भक्तांनी तामदार विरोधात लैंगिक शोषणाची तक्रार दाखल केली आहे.
गुन्ह्याची पद्धत
प्रसाद तामदार स्वतःला ज्योतिषी आणि आध्यात्मिक गुरू म्हणवून घेत होता आणि सोशल मीडियावर त्याचे लाखांहून अधिक फॉलोअर्स होते. तो आपल्या भक्तांच्या आर्थिक, वैयक्तिक आणि आरोग्य समस्यांवर अलौकिक उपाय देण्याचा दावा करायचा.
स्पाय ॲपचा वापर: भक्तांचा विश्वास संपादन केल्यानंतर, तो त्यांच्या मोबाईलमध्ये ‘एअर ड्रॉईड किड’ (AirDroid Kid) नावाचे छुपे ॲप इन्स्टॉल करत असे. या ॲपद्वारे तो मोबाईलचा कॅमेरा, मायक्रोफोन आणि लोकेशनचा ताबा मिळवून भक्तांच्या दैनंदिन हालचालींवर आणि खासगी क्षणांवर पाळत ठेवायचा.
लैंगिक शोषण: पोलीस तपासात प्रसाद तामदार समलैंगिक असल्याचे समोर आले आहे. तो पुरुष भक्तांना त्यांच्या अडचणी स्वतःमध्ये घेत असल्याचे भासवून त्यांच्यासोबत लैंगिक चाळे आणि अश्लील कृत्य करत असे. तक्रारदाराला वेश्यागमन करण्यास भाग पाडून, ते कृत्य ॲपद्वारे पाहिल्याचेही उघड झाले आहे. तो पुरुष भक्तांना अंग चोळून आंघोळ घालत असे.
महिलांचा सहभाग: तामदार महिला भक्तांसोबत नाचतानाचे आणि त्यांच्यासोबत संवाद साधतानाचे अनेक व्हिडिओ सोशल मीडियावर आहेत. तो मठात येणाऱ्या महिलांना ‘माहेरपणाला’ आल्या आहेत असे सांगून त्यांच्यासाठी जेवणावळी ठेवत असे. मात्र, आतापर्यंत महिलांच्या लैंगिक शोषणाबाबत कोणतीही तक्रार दाखल झालेली नाही.
आर्थिक फसवणूक: तामदार याने मठाच्या उभारणीसाठी आणि मदतीच्या नावाखाली एका तक्रारदाराकडून हजारो रुपये उकळल्याचेही समोर आले आहे.
Pune असा झाला पर्दाफाश
मधील एका भक्ताचा मोबाईल फोन सतत गरम होत असल्यामुळे त्याने तो माहिती तंत्रज्ञान क्षेत्रातील मित्राला तपासण्यासाठी दिला. त्यावेळी मोबाईलमध्ये छुपे ॲप असल्याचे आणि त्याद्वारे कोणीतरी बाहेरून मोबाईल नियंत्रित करत असल्याचे उघड झाले. यानंतर इतर भक्तांनीही आपले मोबाईल तपासले असता, त्यांच्या मोबाईलमध्येही तेच ॲप आढळून आले. आपली फसवणूक झाल्याचे लक्षात आल्यानंतर काही भक्तांनी एकत्र येऊन तामदारला जाब विचारला आणि पोलिसांत तक्रार दाखल केली.
पोलिसांची कारवाई
बावधन पोलिसांनी अलिकडेच प्रसाद तामदारला अटक केली आहे. त्याच्यावर फसवणूक, विनयभंग, लैंगिक शोषण, गोपनीय माहितीचा गैरवापर, महाराष्ट्र नरबळी आणि इतर अमानुष, अघोरी प्रथा व जादूटोणा प्रतिबंधक कायदा आणि माहिती तंत्रज्ञान कायद्यांतर्गत गंभीर गुन्हे दाखल करण्यात आले आहेत. पोलिसांनी त्याचा मठ आणि घर सील केले असून, त्याला काही दिवसांसाठी पोलीस कोठडी सुनावण्यात आली आहे.
या भोंदूबाबाकडून आणखी कोणाची फसवणूक झाली असल्यास त्यांनी पुढे येऊन तक्रार दाखल करावी, असे आवाहन पोलिसांनी केले आहे.