हॉटेल भाग्यश्रीच्या मालकाचे अपहरण: प्रसिद्धीसाठी रचलेला स्टंट की खरंच घडला गुन्हा?
धाराशिव: मटणाच्या ‘ढवारा थाळी’मुळे राज्यभर प्रसिद्ध झालेल्या हॉटेल भाग्यश्रीचे मालक नागेश मडके यांच्या अपहरणाच्या आणि मारहाणीच्या बातमीने खळबळ उडाली आहे. २३ जुलैच्या रात्री ही घटना घडल्याचा दावा मडके यांनी केला आहे, मात्र तीन दिवस उलटूनही पोलिसांनी अद्याप गुन्हा (एफआयआर) दाखल केलेला नाही. पोलिसांच्या या भूमिकेमुळे आणि मडके यांच्या वक्तव्यांमधील विसंगतीमुळे हे प्रकरण म्हणजे केवळ एक ‘पब्लिसिटी स्टंट’ असल्याचा संशय बळावला आहे.
हॉटेल भाग्यश्री नेमके काय घडले?
नागेश मडके यांनी माध्यमांना दिलेल्या माहितीनुसार, २३ जुलै रोजी रात्री साडेनऊच्या सुमारास ते हॉटेलबाहेर उभे असताना एका गाडीतून आलेल्या पाच अज्ञात व्यक्तींनी सेल्फी काढण्याच्या बहाण्याने त्यांना गाडीत ओढले. गाडी वेगात चालवून सुमारे पाच किलोमीटर फरफटत नेले, मारहाण केली आणि रस्त्यावर फेकून दिले, असा दावा मडके यांनी केला आहे. या घटनेनंतर मडके यांचे रुग्णालयातील बेडवर बसून रडत असल्याचे व्हिडिओ सोशल मीडियावर वेगाने व्हायरल झाले.
‘ढवारा थाळी’ आणि फॉर्च्युनरमुळे आलेली प्रसिद्धी
नागेश मडके यांचे हॉटेल भाग्यश्री हे खास ‘ढवारा थाळी’साठी प्रसिद्ध आहे. संपूर्ण बोकडाचे मटण वापरून बनवलेली ही थाळी मराठवाड्यात लोकप्रिय आहे. सोशल मीडियावर हॉटेलसमोरील बोकड कापण्याचे आणि गर्दीचे रील्स व्हायरल झाल्याने मडके अल्पावधीत प्रसिद्धीच्या झोतात आले. ‘ढवारा थाळी विकून फॉर्च्युनर घेतली’ या बातमीने तर त्यांना राज्यभरात ओळख मिळवून दिली. अनेक मोठ्या माध्यमांनी त्यांच्या यशाची दखल घेतली होती.
पोलिसांची भूमिका आणि वाढता संशय
एवढ्या प्रसिद्ध व्यक्तीच्या अपहरणाची बातमी असूनही पोलिसांनी गुन्हा दाखल करून घेण्यास दिरंगाई केल्याने आश्चर्य व्यक्त होत आहे. पोलीस सूत्रांकडून मिळालेल्या माहितीनुसार, नागेश मडके यांच्या जबाबात तफावत आढळून येत आहे. घटनेच्या पहिल्या दिवशी त्यांनी कुठेही बंदुकीचा उल्लेख केला नव्हता, मात्र नंतर डोक्याला बंदूक लावून धमकी दिल्याचा दावा ते करू लागले. याशिवाय, गाडीतून १४० च्या वेगाने फरफटत नेऊन फेकल्यानंतर शरीराला गंभीर इजा व्हायला हवी, मात्र तसे काही दिसत नसल्याचेही पोलिसांचे म्हणणे आहे. मडके यांनी काही दिवसांपूर्वीच सुरक्षेसाठी बॉडीगार्ड ठेवले होते, ते घटनेवेळी कुठे होते यावरही समाधानकारक उत्तर मिळालेले नाही.
या सर्व विसंगतींमुळे पोलिसांनी आधी सखोल चौकशी करून मगच गुन्हा दाखल करण्याची भूमिका घेतली आहे.
प्रसिद्धीसाठी स्टंट की खरी घटना?
सोशल मीडिया आणि प्रमोशनचे तंत्र चांगलेच अवगत असलेल्या नागेश मडके यांनी केवळ प्रसिद्धीसाठी हा बनाव रचला असावा, असा एक मतप्रवाह सोशल मीडियावर जोर धरत आहे. वाढत्या स्पर्धेत चर्चेत राहण्यासाठी हा स्टंट असू शकतो, असे काहींचे म्हणणे आहे.
दुसरीकडे, जर हे प्रकरण खोटे असते, तर मडके यांनी पोलीस तक्रारीपर्यंत जाण्याचे धाडस केले नसते. कारण चौकशीत खोटे उघड झाल्यास त्यांच्यावरच कायदेशीर कारवाई होऊ शकते. त्यामुळे, त्यांना झालेली मारहाण आणि अपहरण हे खरेच असावे, असे मानणाराही एक वर्ग आहे.
सध्यातरी, नागेश मडके गुन्हा दाखल करण्यासाठी आग्रही आहेत, तर पोलीस पूर्ण चौकशीनंतरच पुढील कारवाई करण्यावर ठाम आहेत. या हाय-प्रोफाईल प्रकरणामागील खरे सत्य काय आहे, हे पोलिसांच्या तपासानंतरच उघड होईल.